weblogUpdates.ping Taneak Jang, Rejang Land, Tanah Rejang http://rejang-lebong.blogspot.com Taneak Jang, Rejang land, Tanah Rejang: Teleu Basoak

Teleu Basoak

·

Document R McGinn


TAMBO EJANG LEBONG

CENRITO LEM BASO EJANG MUSEI



Teleu Basoak


1

Meno o adé rajo sugéak. Bapak ne o sugéak lut. Anak ne adé teleu. Teleu basoak o kemelbéak cu'ik ne. Wakteu si bi lei jano kelak anak ne o, tenotoa bapak ne. Sapié lei gi maju cu'ik.

Bapak ne matié. Matié, tinga inok ne igei. Wakteu tinga inok ne o, an-an, matié kulo inok ne o. Si yo kemelbéak nien sugéak ne. Hak deu. Biaso cu'ik nano, coa lak bekakok. Jano adé nak dasié ne o. Misal ne umei ne libea, cigei caci. Si jemuoa umei. Sudo jemuoa umei, bi abis kulo tokoa umei. Si jemuoa kulo areak umeak ne di leyen ne. Umeak ne o deu. Udo o bi cigei kulo penan ne. Umeak ne déwék tak ne jemuoa. Biak hak tobo yo.

Teleu basoak selawié kete yo nano. Asoak ne di piset yo tun penyebit. Si yo genyei tema'ak pekué jisanak ne o. Jisanak ne coa lak temotoa. Tobo yo bi cigei adé hak. Tobo yo melarat aleu mai beak imbo. Wakteu melarat mai beak imbo, jano nembin ne beak imbo: pitat, petus, linggis. Diyo ba di adé ngen si igei.

Sapié nak beak imbo, nadeak asoak ne, "Dang oak ige ite mai beak imbo yo. Bé adé benatang buas. Jibeak ba menea pondok nak piyo bai," nadeak ne. Udo o si menea pondok nak beak imbo o. Bi an diem beak imbo. Bi ke'ing kulo dawen puea, minoa pondok ne. Nadeak asoak ne, "Cenubo makié dawen lalang kulo. Dawen lalang o biaso ne padék. Wakteu ite gi sugéak belo o, anak bueak bapak o awit menea atep ke'ung sapei te ngen dawen lalang," nadeak ne awié o. Ijei nenea pondok, atep dawen lalang, jijei pondok ne.

2

Adé rajo kunai tebo lei, mai mebureu mai beak imbo o. Wakteu rajo o mebureu kenléak ne adé pondok nak beak imbo o. Do kulo tenngoa ne adé sa'ié tun ngota. Wakteu si ngota o rajo o mimbang jano kécék tobo yo.

Nadeak di tuei su'ang magea di asoak ne nano, "Jano kelak nu, Asoak?"

"Lebéak baik jisanak madeak kelak dete."

Nadeak jisanak di tuei o, "Kelak ku lak jijei babu rajo. Jano jijei tukang kesak ne, ijei tukang tepap ne, maro!" nadeak ne. "Asal uku embuk baik, embuk monok, embuk jano bai adé," nadeak di jisanak ne di tuei su'ang.

Sudo o nadeak di nomor duei o. Nadeak ne, "Uku temotoa kelak jisanak kulo," nadeak ne. "Amen jisanak mepuk pinggan, misal ne, uku semupeu umeak. Amen jisanak semupeu umeak," nadeak ne, "uku mepuk pinggan." Pokok ne jano kakok jisanak uku temulung. Temotoa jano kelak jisanak," nadeak di nomor duei o.

Ijei o jisanak ne di tuei su'ang o temnei ngen asoak ne di piset o, "Jano kelak nu, Soak?" nadeak ne.

Asoak ne yo jemawap, "Uku lak ijei ngenyan rajo."

"Ku'ang ajea ko a! Awak kidék! Awak titik lak ijei rajo!" nadeak jisanak ne. Coa si nam pakei asoak ne di piset su'ang o di paling alep, di paling pacak ne.

Wakteu rajo gidong mimang o nano, tenngoa cerito o, lajeu cigei si mebureu. Si o semelidik ne jano tun nien, jano tobo yo semat. Sudo o si mepék tando nak keliling pondok o mako si coa limeu teko igei ke'ung yo ne. Udo o rajo o bélék mai penan ne igei.

Udo o teko kaben yo keduei. Si embin tentera ne. Tun teleu basoak o senergap ne. Sudo si semergap si embin tun teleu o mai sadié ne. Wakteu embin tun teleu o, si embin ne o ca'o baik-baik. Temanyé ngen baik ngen tun teleu o. Wakteu si sapié nak umeak rajo o, tun teleu basoak o senambut tun ngen baik, awié kulo rajo. Kete ne madeak: "Ngen dipe rajo lak napag?"

Udo o rajo madeak, "Uku lak napag ngen saleak su'ang tobo yo, ngen ca'o te, makié pengelié, temotoa ca'o Ejang. Makié kejei awié tun umbung biaso ne," nadeak rajo.

Ijei o wakteu si lak napag, di teleu basoak o madeak. Nadeak jisanak di tuei o, "Oi, lajeu asoak te nien, napag ngen rajo yo."

"Ite temotoa bai," nadeak asoak ne nomor duei o. "Jano kelak te belo o? Jisanak lak jijei tukang mepuk pinggan awié o."

Rajo yo nano bi temngoa wakteu nak pondok o. Ipe kulo si yo lak ngen di titik, si alep kulo. Di duei o nano neloak ne ba tukang kesak. Areak embuk mié nelié ne, daging monok, jano kelak ne nelié ne.

3


Jisanak ne duei o agak jengik kemléak asoak ne o. Rajo gidong aleu mai negrei leyen, asoak ne yo nano belpas. Lahér adé anak ne semanié. Meding si jengik kemléak asoak ne o, si di ijei babu ne. Tak ne mukus anak ne o. Nukus, si mepék nak lem petei tak ne monot. Monot, jijei bi oak monot. Temeu ngen tun tuei gidong mai bioa. "Jano gén do'o?" nadeak ne. Petei sakut nak tebet nak di o. "Jano si areak alat tun monot? Teak, umeak tun monot." Sudo o si mak, nembin ne petei o. Sapié nak umei ne nak penan ne diem o si mukak. Nukak, kenléak ne adé titik nak lem o gidong tawei, semanié. Udo o semanié o tengén ne. Gén ne Ujang. Meding si coa dé anak, sayang lut si ngen Ujang o. Bi lei titik o si majea. Najea ne awié ca'o tun leyen majea anak ne nien.

Ijei o ite bélék mai cerito madeak penan jisanak ne duei basoak o mambung titik o nano. Tak ne gemitié ngen anak kuyuk, anak ne nien nonot ne. Ijei o, wakteu rajo bélék, selawié duei nano, jisanak ne o, madeak ngen rajo, "Oi, Rajo!" nadeak ne. "Asoak ku belpas, anak ne kuyuk!"

Rajo tekjir. "Maso!" nadeak ne. "Maso bié menusyo banak kuyuk! Do'o coa te nam madeak ne!" nadeak rajo ne.

"Coa kémé dé temingga asoak. Teak ba bene kete ne nak lem kelak Tuhan?" nadeak ne, "Asoak te yo belpas kuyuk," nadeak ne.

Rajo yo jengik. Panes cuma coa si nam madeak ne kerno anak ne nien, sako ne o. O ba o si baik-baik midup kuyuk o, nidup ne kuyuk o. Do'o ba ra'yat deu o mimak, "Padeak rajo o anak ne kuyuk," nadeak ne. Coa ba rajo o kemian. Coa rajo o demulei. Sudo o an-an ne. Ijei wakteu ngenyan ne o gidong kidék, ules ne o rajo aleu igei. Aleu igei, gidong rajo coa dasié belpas igei ngenyan rajo yo. Anak ne é semanié igei. Sudo belpas semanié, jisanak ne duei o menea awié belo o igei. Nepék ne lem petei, nukus ne baik-baik, di jisanak ne tuei o di monot ne.

Coa an sudo o, rajo o bélék, si madeak asoak ne bi belpas igei. Madeak anak ne kucing. Tambeak jengik bai rajo. "Maso!" nadeak ne. "Bi duei kilei belpas, kuyuk, kucing anak ne o."

Ijei o si coa as kemléak ngenyan ne. Ngenyan ne madeak: "Do'o coa te nam madeak ne. Do'o ba bagei te."

Si temngoa kécék ngenyan ne awié o, o ba si sadar. Nadeak ne, "Amen bagei te awié o coa te nam madeak." Senido ne ba kucing o.

Ijei anak di nonot o nano, wakteu embié tuei o gidong lak muang pegas mai bioa, kemléak adé petei. Nemak ne, si embin, si mukak. Kemléak adé cupik samo nien papa ne ngen di tenmeu ne dete belo o. O ba si temgén di nomor duei o Buyung. Tun duei o temanang coa dé anak, ijei o riang lut si adé anak duei-duei. O ba si majea tun duei yo. An-an bi lei kulo tun duei o,pacak kulo bepanuo. Pacak panuo, pacak miling. Ati jako ne pacak miling si bi miling. Ati jako ne pacak bepanuo si bi bepanuo.

Ite bélék mai magea cerito di teleu basoak o nano. Di ngenyan rajo yo arung sebit. Pogoa mékér. Gén padeak, "Anak ku ules ne awié kucing." Do'o ba indok ne yo sayang ngen kucing. Negong ne, senium ne. Mengindoi si kemléak kucing, ngen kuyuk o.

Sudo o an bi ke'an ke'ung yo ne igei. Rajo o aleu igei, ngenyan ne gidong kidék kulo. Sudo o wakteu rajo laleu, belpas kulo ngenyan rajo. Anak ne yo selawié.

Jisanak ne duei nano janjing ngen asoak ne di jijei ngenyan rajo. Belpas di ketleu yo, cupik ne selawié, si menea igei awié belo o. Nambung ne igei cupik selawié o, nonot ne. Ijei o wakteu rajo bélék, bi genitié ne ngen kambing.

Kerno siut, o ba jisanak ne duei o menea awié o nano. Maksut ne gemitié yo kerno si kemelbéak lak kulo ngen rajo. Kaleu ngenyan ne o sena'ak ne, ke'ung yo si di jijei ngen rajo. Nadeak ne, "Aturan ne ite belo o jijei ngenyan rajo riang ite. Lajeu asoak te, bagei te tukang kesak. Si idup senang," nadeak ne a.

Sudo o wakteu gemitié ngen kambing, bélék rajo. Ijei o rajo o madeak. "Do'o cigei si bejako," nadeak ne. Ra'yat deu nak di o pogoa mimak rajo. Banak kuyuk, banak kucing, banak kambing, nadeak ne. Coa si dekmai ngen anak tun. Do'o ba rajo o pékér, "Ami ngenyan ku yo iso si tun? Jano yo benatang? Bene keselé yo ngenyan ku yo?"

Udo o teko tentera rajo. "Si awié yo, rajo," nadeak ne. "Ngenyan nu yo iso si tun. Ite mékét ne bai." Nékét ne ngenyan ne o genatung nak iding dalen. Kékéa tangen nékét. Api bai melitas semisit selawié o. Tingga ba serwa ngen bajeu nak awak. Api bai melitas semisit ne. Daging ne senileak, nepék areak di pelgéak ne atau cuko. O ba pogoa mengamuk terus, tip bilei awié o.

4


Bélék te magea cerito mai titik selawié di nonot o nano. Penyudo ne temmeu tun tuei o igei. Wakteu temmeu tun tuei o madeak, "Do'o petei, adé do igei. Asei ku cigei leyen tun o besi isei ne," nadeak ne. "Diyo adé ba penan, cupik asei ku, tun jengik kemléak anak ne. Teak si anak apang, teak jano ba," nadeak ne. Udo o si mak titik selawié o. Kerno si coa dé anak, nepék ne gén cu'ik anak ne awié o. Tengén ne Upik. Ati jako ne si bi nam tawei bi tawei, ati jako nam panuo bi panuo, samo ngen di duei nano. Ba'es titik teleu o, dekmai bai papa ne, cuma dikup selawié.

Adé di ninik ne tun gerot deu ilmeu, deu pakié, a. Ijei o najea ne Ujang ngen Buyung yo nano. Najea ne besilék, misal ne, angar, menimbak. Ati si enggut dapet ninik ne majea ca'o nien ne si bi pacak menimbak. Udo o ninik ne o majea silék. Ati si jako dapet si bi pacak. Penyudo ne o si o main pana. Main pana, ninik ne mepék jambeu nak das boloak nidik keno. Penyudo ne si kemelbéak pacak ne duei basoak o. Tak ne meluk mindas, sudo o nidik, keno. Kemelbéak pidik ne. Tei ne o kepacak ne ngen pakié ne

Adé Upik nak dasié, adé pakié ne kenai. Tun o kemelbéak nien alep. Teméngbék kudo pacak si.

5


Adé uleak ninik ne yo bilei-bilei. Uleak ne yo mebureu. Do'o ba bok si majea Ujang ngen Buyung o mebureu. Mebureu awié yo ca'o ne menimbak. Sudo o wakteu adé debilei ninik ne yo mai mebureu, si mai kulo. Tekléak ne uso. Netak ne temimbak keno matié uso, nembin ne bélék. Do'o ba tun lemo nak di, ninik ne duei ngen teleu basoak, embuk daging o. Senang si.

Jano uleak ninik bié ne nak di o, tenanem ne areak bungei-bungei neraés ne nak keliling umeak ne. Si temanem kulo areak gén lapen o. Nelu'us ne ba'es-ba'es ne. Amen tun sapié ketén bungei o, alep. Tenanem ne areak boak-boak,

An bi ke'an ninik semanié ne yo bi tuei kulo. Udo o ninik ne yo matié. Matié ninik ne, tinga ninik selawié ne, ngen titik teleu basoak o. Upik betenei, "Jano adé pesan ninik semanié ayak si matié?" Ninik bié coa jemawap.

An-an Ujang ngen Buyung o pogoa mebureu areak uso, areak kijang. Amen si mebureu uso, coa si embet uso o, gidong tejé tenimbak. Nadeak Buyung, si lak kemléak kepacak ne duei basoak o. Nadeak asoak ne, "Jisanak," nadeak ne, "di dipe tenimbak nu? Jano temimbak uso, jano temimbak kijang?" nadeak ne.

Nadeak Ujang, "Uku lei, uku temimbak uso awié o a".

Nadeak Buyung, "Amen ko temimbak uso diem ba nak piyo. Uku malau uso kunai doloi, imbo doloi o." Uso gidong mengacap kedelas jano ne. Ujang temimbak keno matié uso o.

Sudo o si lak kemléak gerot asoak ne. "Ko titik ko temimbak kijang," nadeak Ujang. "Uku malau ne o." Sudo nalau kijang, kijang o gidong melitas kemelbéak delas ne melilei. Buyung temimbak keno kulo. Areak daging coa si tekembuk igei.

Ijei o, uleak Upik nak dasié, kerjo ngen ninik. Jano uleak ninik ne? Misal ne o menea areak bajeu makié benang, menea areak sauk. Najea ninik ne ca'o tun temakep kan.

Ijei o wakteu Ujang ngen Buyung bélék medasié, adé manat ninik ne ayak si matié. Si o temingga magea ninik bié ne. Nadeak ninik ne ngen Ujang ngen Buyung, "Jemago asoak udi yo baik-baik! Pesen ninik udi." Nadeak ne, "Dang sapié asoak udi o celako atau sileak sebap asoak udi yo gi titik. Senggeak si titik yo mémang si yo pacak." Manat ninik semanié ne, adé kulo ngen ninik bié. "Amen Ujang ngen Buyung lak mebureu, jibeak galak mai tebo luea kunai tebo penan ne galak magea. Sebap amen si mai tebo leyen bé adé celako atau dapet hal atau balak.

Sudo o, ninik ne coa nelié namen wakteu Buyung ngen Ujang aleu mebureu mai imbo leyen.

6

Wakteu mebureu mai imbo leyen, temmeu si tun gidong mesoa ebes. Jijei tun gidong mesoa ebes o tekjir, nadeak ne awié yo magea tun duei yo, "Jano nesoa udi aleu beak imbo yo?"

"Kémé yo aleu mesoa uso ngen kijang."

"Oi", nadeak ne, "nak piyo deu lut kijang. Sebap korok yo awit tun mebureu kulo. "Genyei si temimbak uso o coa lak keno," nadeak ne

Nadeak Buyung, "Padeak kecalak uso piyo!"

"Nien," nadeak tun mesoa ebes o. Sudo o wakteu si madeak awié o melitas uso.

Tukang ebes o temunjuk dé'é. "Uso melitas! Timbak ba!" nadeak ne. Uso melitas temngoa. Wakteu tukang ebes o madeak, uso o tebedan.

Nadeak Ujang, "Amen meloak uku temimbak uso o, mai kalau ne! Keloak si melilei!" Aleu tukang ebes o malau uso o. Uso o gidong melilei. Si melilei kelebéak delas ne. Netak ne temimbak, keno, matié uso o. Ujang melié ngen tukang ebes o. Ijei o tukang ebes o nano cigei mesoa ebes. Kelbéak riang dapet uso nano, si bélék. Bélék, tukang ebes o nano embin mai sadié ne, penan Ujang ngen Buyung yo lahér. Si embin uso o, si majak tun meduo ca'o ite Jang ba. Neduo tun deu. Neduo ne kulo rajo.

Amen rajo kemléak uso o, tekjir si. "Jano?" nadeak ne. "Wai ipe udi mak uso o? Kémé bai mebureu uso coa dapet," nadeak ne.

"Uso yo iso si dapet ku idup."

"Nemak nu?" nadeak rajo! "Ko melié tun embuk bukié uso?" Awié o, lak nengéak ne semanié tukang ebes o.

Jawap ne, "Coa si uku monoak ne awié o. Adé tun duei mebureu uso. Titik kelbéak nien ba'es ne. Bi lak dekmai ngen papa nu kulo," nadeak ne awié o.

Sudo o nadeak rajo o, "Amen awié o, maro ba! Tengén titik tobo o galak mebureu?" nadeak ne.

"Asei ku uyo tip bilei si mebureu mindi, si awit buléak. Sudo o penyiep ba rajo o ngen tentera ne lak aleu mebureu. Tentera ne mileu. Kaben yo nano awié tun lak aleu mandun perang, jano lak mandun mesoa uso nien.

Si aleu mai beak imbo. Wakteu mai beak imbo temmeu kulo ngen titik duei é, ngen anak ne yo. Si coa namen.

"Jano uleak udi yo?" nadeak rajo.

"Mesoa uso," nadeak Ujang.

"Kémé yo lak mesoa uso kulo nak piyo. Lak berpak ite mesoa uso," nadeak rajo awié o.

"Amen lak mesoa uso," nadeak tukang ebes o—tukang ebes o mai kulo diyé temunjuk penan ne—"nak di gi adé."

Nadeak Ujang o, "Maro ba te temimbak ne amen adé." Decang udo o tekléak rajo uso. Rajo o kemléak uso o. Nadeak ne, "Dé'é uso a! Mai ba timbak ne!"

Buyung madeak, "Amen meloak kémé temimbak ne, jibeak temimbak gidong tidoa. Amen lak temimbak gidong tidoa, timbak ba kak rajo." Rajo yo temimbak uso o, coa keno.

Sudo o nadeak Buyung o nano, "Ai, dang kumu mai mebureu temotoa kémé amen barat yo. Keléak ca'o kémé amen lak temimbak uso o," nadeak ne. Decang sudo si madeak, adé kulo uso melitas.

Nadeak rajo, "Dé'é uso! Timbak ba!

"Amen meloak uku temimbak," nadeak Buyung, "aleu kalau ne keloak si melilei." Mai rajo malau. Uso gidong melilei kelbéak nien delas ne. Netak Buyung o temimbak ne, keno. Matié uso o. Rajo o sapié cengang. Cengang, melitas kulo kacéa gidong melitas kemelbéak delas ne. Netak Ujang temimbak kunai belakang matié. Sapié rajo o sélég.

Sélég rajo, anak bueak rajo o bi mengéak kulo. "Udi tun ipe?" tenei ne.

"Kémé diem beak imbo. Diyo ba uleak kémé," nadeak Ujang.

Nadeak tentera rajo o, "Udi lang?uk nien diem beak imbo. Kémé diem sadié, coa si awié udi."

"Coa kémé lang?uk, do'o ca'o kémé," nadeak Ujang.

Nadeak kulo tentera rajo o, "Amen udi lak nien tanding te, tai ba ite tanding uyo!"

"Tanding jano kelak udi?" nadeak Ujang. "Amen udi lak majak kémé betanding, tai ba ite temimbak boak léméu nepék nak ujung boloak," nadeak Ujang awié o .

"Maro!" nadeak rajo. Coa rajo namen anak ne di betanding o. Sudo o, Ujang madeak timbak kak rajo dete. Tenimbak rajo, coa keno. Sudo rajo, neloak ne kulo anak bueak rajo kulo temimbak. "Tulung timbak kak udi," nadeak Ujang. Bi adé abéak teleu poloak lai temleu temimbak coa dé si di keno.

Sudo o rajo madeak, "Sapié géléa udi. Timbak ba kak udi!" nadeak ne.

Ujang o temimbak keno. Pecoak léméu o.

Nadeak Ujang, "Udi lang?uk. Lak majak kémé beto'oak. Beto'oak temimbak léméu yo bai, coa udi keno. Amen udi lak kemléak kepacak te, awié yo!" nadeak Ujang. Si mak boak léméu, si meluk, Buyung temimbak pecoak kulo léméu o. Tobo duei yo nano o najea ninik ne sak kunai titik. Tenawei ne bae tun majak betanding é.

Ijei rajo yo panes atié ne. Rajo yo bélék mai sadié ne. Ayak si bélék, si madeak ngen tun duei o, "Nak ipe udi diem?"

"Kémé diem nak beak imbo."

Nadeak rajo o, "Ke'ung yo kémé aleu meto mai beak imbo, penan udi é."

"Buléak bai!" nadeak Ujang. Sudo o si aleu. Ujang ngen Buyung yo bélék mai penan ninik ne. Rajo o bélék kulo mai sadié ne.

7

Wakteu si bélék mai penan ninik ne o, ninik ne gidong sakit. Ninik ne o madeak ngen si. "Uyo cigei an igei idup ku yo. Udi yo iso si anak ku, iso," nadeak ne. "Udi dapet ku monot, udi teleu yo. Uku madeak di nien ne. Udi gi adé indok ngen bapak."

Tekjir titik teleu basoak o. Si o beindok magea ninik ne o. Nadeak ninik ne o, "Udi dang beindok magea uku. Udi beninik bai," nadeak ne. Udo o si mengindoi temngoa cerito o. Si yo iso si anak indok ne o. Si diem ngen ninik.

Adé pesen ne o. Nadeak ninik, "Udi duei semanié yo arus jemago asoak di selawié yo baik-baik, dang sapié adé celako. Jano kelak asoak ne o dang coa mak, dang coa melié," nadeak ne.

"Au," nadeak Ujang awié o.

"Jijei ba dé'é, Ninik," nadeak Buyung. Ijei o titik teleu o kelbéak nien ibo ne temi'uk ngen pesen ninik ne o.

Ninik ne o meningea. Si kemoboa nak lé'ét ji'et ninik semanié ne. Sudo kenoboa nelé'ét cupék, titik teleu yo pogoa ngindoi.

8

An sudo o, Ujang ngen Buyung aleu mai mebureu. Ijei o si bélék, Upik madeak. "Uku adé kelak ngen Jisanak."

"Jano?" nadeak Ujang ngen Buyung.

"Uku adé pesen ninik," nadeak Upik. "Ninik meloak mak bioa pacoa o kunai rakso, meloak mak bungei pacak berjung, meloak mak burung pacak miling. Penan ne nak Tebo Tepuk nak doloi o."

Ujang ngen Buyung madeak, "Ijei ba amen si madeak awié yo." Si namen, jano kelak asoak ne o, ninik ne madeak, dang coa mak awié o. Kinget, mak kudo ne. Si mepék nak denam pondok ne lajeu madeak ngen Upik. "Ko diem ba nak pondok yo baik-baik. Dang ko laleu. Gén kembuk nu cukup. Ke'an kémé yo laleu. Ko arus kemléak tando kémé. Amen kémé dapet kelak ninik atau kelak Upik, mojoa ba. Amen coa, coa te nam madeak ne," nadeak Ujang awié o.

Ayak si aleu o si menea tando. Adé di Ujang mepék ping?an das lémén. Nepék ne baik-baik. "Amen pinggan yo pecoak tando uku matié," nadeak ne awié o.

Sudo o Buyung gematung pisuo nak das pageu. Nadeak ne, "Amen pisuo ku yo bé ngecacak daleak mai pinggan jisanak, tando ne uku matié kulo."

Sudo o aleu ba si duei basoak. Coa si aleu mai do pemanuo. Leyen. Misal ne dalen yo becabang duei. Aleu di Ujang aleu kak yo, Buyung aleu kak di.

Wakteu Ujang o aleu kak yo, sapié si nak sipang. Si temmeu tun tuei. Tun tuei madeak, "Amen ko lak mai mindi, jano kenléak nu nak dalen, dang monoak ne. Dang ko demulei ne. Mai ba, ko laleu terus," pesen tun tuei o nano.

"Ijei ba amen awié o," nadeak ne. Coa an sudo o, nak dalen kenléak ne imuo, kenléak ne siamang, kenléak ne uso melitas o, kenléak ne kelwang kelei umeak mengekik iding ti'uk ne. Si rényéng. Rényéng si bi lak sapié nak tebo, kerno temngoa nadeak tun tuei nak sipang o, nano—"Jano kenléak dang temimbak ... amen ko temimbak udi adé bahayo"—terus ba si laleu. Kelbéak deu di gemurék si nak dalen. Si lak temimbak benatang. Wakteu si lak temimbak imuo o, ijei ba si buteu. Matié. Ujang jijei ba si buteu.

Tingga ba Buyung. Terus bekesoa, terus bekesoa, limeu dalen. An-an temmeu dalen becabang duei, penan Ujang betenei nano, temmeu ngen tuei o. Nadeak ne, "Bene ko nak piyo?

"Uku coa nam dalen ne. Uyo uku lak temotoa dalen jisanak ku bai," nadeak ne.

O ba tun tuei madeak, "Jano kenléak nu nak dalen, dang ko gemurék."

"Ijei ba," nadeak ne. Si terus bekudo. Bekudo, deu ba mecem penmeu ne. Penyudo ne si kemléak burung. Burung o mengekik. Sua'o ne pogoa mekak. Buyung o lak temimbak. Ijei buteu kulo Buyung yo.

Bélék ite ngen Upik di tingga su'ang nak pondok nano. Si kemléak tando di Ujang, pinggan ne pecoak. "Bi matié jisanak ku." Kemléak di Buyung, pisuo ne bi ngecacak daleak mai pinggan pecoak. "Ai!" nadeak ne, "Amen awié yo jisanak ku matié kete." Upik menyiep areak alat-alat ne. Areak juadeak nembin ne kulo. Si mak kudo. Ayak si laleu, Upik mai magea ji'et ninik ne. Nadeak ne awié yo, "Ninik, " nadeak ne. "Uku yo aleu mesoa jisanak ku. Matié kete. Uku lak mesoa buktié ne. Amen si idup kinai te bé, mojoa," nadeak ne. "Amen si matié bé cigei te nam madeak ne.

Udo o Upik temngoa sa'ié o kunai ji'et ninik ne o. "Mai ba. Uku meloak ko laleu."



Lajeu ba seak. Upik laleu semsung lat jisanak ne. Si temmeu ngen tun tuei nak sipang penan Ujang ngen Buyung betenei. Nadeak ne, "Lak mai ipe angguk nu, Gadis?"

Nadeak Upik, "Uku lak aleu mesoa jisanak ku."

"Totoa dalen yo, dalen penan nelitas jisanak nu yo nano. Tapi ada janjei didik," nadeak ne. "Jano bai benatang gemurék ko, ko dang monoak ne," nadeak ne.

"Ijei," nadeak ne awié o. Ayak si aleu, Upik mepék kapes nak ti'uk ne mako coa deu gén tenngoa ne. Si aleu bekudo. Nak dalen cem-cem penmeu ne, cuma coa si temngoa. Coa an kenléak ne jisanak di beduei o bejijei buteu. Ujang madep medék. Buyung madep milot.

Ngindoi si kemléak jisanak duei o. Wakteu si ngindoi, sapié burung. Burung yo pacak miling.

"Ko lak aleu mai ipe, Gadis?" tanei burung.

Upik o cengang. "Uku teko mindai lak mai magea jisanak ku," nadeak ne.

Nadeak burung o, "Nien, jisanak nu yo tun gerot. Coa lak temgeak kun?eu. Sifet ne o embin sifet tun gerot," nadeak ne. "Uyo adé ca'o ne. Kemak sarat. Mak sergayeu ngen bioa. Bioa o nundak ngen bioa belas didik, necik mai buteu o. Do'o ba sarat ne," nadeak burung o. Upik mak bioa di nadeak burung o nano. Si mecik kékéa tangen tun jijei buteu nano. Ujang ngen Buyung idup igei. Kudo nano di jijei buteu nano bélék idup igei.

Ayak si lak aleu, burung teko. Nadeak ne magea Upik, "Adé nien pesen?"



Padeak semulen o, "Adé nien. Lak burung pacak miling, bungei pacak menyanyi ngen bioa macoa bioa rakso."

Nadeak burung o, "Kemak nak tebo o. Coa si oak kunai yo." Lajeu dekuat teleu basoak o ngen burung pacak miling o. Mai si mak ne. Wakteu si embin bélék, bungei negong ne yo menyanyi. Di burung o miling, bi jijei kuat ne, mileu tobo o bélék. Wakteu embin, bioa rakso kunai bioa macoa nano, cemimbié awak ne.

Tobo yo bélék mai pondok ne. Bioa macoa kunai rakso nano, cenu'ié ne mai iding ji'et ninik ne duei o. Adé di bungei pacak menyanyi o nano, tenanem ne nak natet di keno angin-angin. Adé burung pacak miling yo nano nepas ne bai. Jano nadeak tun tenotoa ne.

Ijei o bi senang si kemléak awié o. Wakteu si gi titik belo o deu temanem areak boak-boak, areak jambeu, areak manggus nak natet o. Bekboak kete tanem-tanem ne nano. Manggus ne uyo gidong mesak.

9

Ujang dan Buyung aleu mai meto. Wakteu si laleu sapié ba nak penan sadié rajo o. Sapié nak di o, si lak majak rajo mebureu, lak mendes rajo o aleu mai mebureu. Rajo yo lak najak aleu mai mebureu.

Ayak si laleu, tobo yo kemléak adé selawié tepékét. Nadeak Buyung, "Bene selawié o di nogoa udi semisit?" (Coa si namen do'o indok ne, tun duei o.) Selawié o tecengang kemléak tun duei o. Cigei si meding tun semisit awak ne, mepék areak cuko. Cigei si meding pelgéak kemléak tun duei o, asei-asei anak ne. Mémang anak ne nien, cuman si coa namen. Coa rajo yo kemian selawié tepékét o nano. Rajo yo bangso temngoa nadeak anak bueak ne. Tobo yo lajeu aleu. Selawié tepékét nano pogoa ngindoi kemléak titik duei o.

Rajo yo mebureu coa si awié lak nien. "Amen awié yo," nadeak Ujang, "meto bai ngen kémé." Sapié nak pondok, tenngoa rajo rami sa'ié tun menyanyi. Bungei menyanyi nak penan di keno angin-angin. Kenléak ne bioa macoa mindas. Mémang bioa macoa rakso. Burung becénéu miling. Do'o kulo o, kea umeak ne o licin awié bioa ne, kerno kegerot ilmeu ninik ne o belo o.

Si kemléak awié o, nadeak rajo o, "Padeak keba'es penan udi yo! Areak bungei deu, pengeléak ba'es, boak-boak deu." Rajo yo tecengang. Burung o meduo rajo mai dasié. Rajo o mai dasié, semsing serwa ne.

"Bene semsing serwa, Rajo? Iso si bioa dé'é. Diyo ba penan te," nadeak Upik o.

Rajo o tecengang kemléak awié o. Rajo o temot. Rajo temot samo bepékér: "Diyo ba baik nebut ijei penan negrei te. Amen ite temuan penan yo, coa si anggen keba'es ne. Tekujat penan te."

Anak bueak ne nano coa mai dasié igei. Pogoa embuk boak. Coa an udo o lak bélék rajo yo. Si madeak ngen tun teleu basoak o, "Uku bélék," nadeak rajo o. Ijei bélék kete rajo ngen tentara ne o nano.

Coa an sudo o rajo teko igei mandun tobo yo perang. Lak mebut talang tun teleu basoak o. Sapié nak di o, anak bueak ne coa dé nyut perang kemléak boak deu o. Tentara ne pogoa embuk boak. Cuma burung o namen niat atié rajo o. "Si o lak merang ite," nadeak ne. "Siap ba udi!" Rajo yo nano lak medasié temimbak tun teleu basoak o. Kemléak anak bueak ne mogoa embuk boak. Sénéak kulo rajo lajeu buyé lajeu embuk boak kulo bekenék pun boak-boak o.

Rajo yo tu'un gacang-gacang, bi kenyang. Anak bueak ne o bi lak perang igei. Sudo o burung o madeak, "Uku namen maksut udi teko mindai. Coa udi lak baik, coa. Udi lak kidék, lak merang tun teleu basoak yo. Kerang ba!" nadeak ne. Timbak ba kémé," nadeak burung o!"

Kemléak awié yo, rajo yo panes. Netak ne temimbak. Titik teleu o gidong belé'ét nak di. Burung nano diem nak das atep, nogoa rajo temimbak. Coa dé keno. Tobo yo deu pakié ne.

Tenawei ne bai. "Amen udi lak mebut talang kémé, coa udi nam," nadeak ne. Rajo yo sapié sélég ngakok. Rajo yo ngakok. Rajo o bélék, coa dé penan mepék papa sélég ne.

10


Wakteu rajo bélék, burung madeak ngen tun teleu basoak. "Pesen ninik udi belo o wakteu udi gi titik," nadeak ne. "Amen udi lak namen inok ngen bapak udi, tapi diyo bahayo. Udi arus mai sadié leyen. Nak di adé tun kidék di lak monoak udi. Do o pesen ninik udi belo o," nadeak burung. "Amen udi lak mai mini, udi arus kemtén kegerot ne." Ninik ne madeak kulo: "Uku melié tobo yo ujien di be'et ne. Uku meloak si mesoa bungei pacak berjung, udo o ngen bioa macoa rakso. Ko arus temulung tobo yo," madeak ninik ngen burung. "Tobo yo arus gerot ngen binei. Tobo yo arus dapet!" nadeak ninik ne. Udo o di igei madeak ninik ngen burung yo: "Amen kemerjo jano-jano tulung-menulung samo ne. Kaleu tobo yo kemerjo kete di nadeak ku nano, uku meloak ko, burung, kemtén bukeu yo." Bukeu yo bisei kete cerito asal-usul udi, inok ngen bapak udi nien ne. "Diyo," madeak burung o ngen tun teleu basoak o. "Baco bukeu yo, mako udi namen api udi di sebenea ne." Lem bukeu yo adé petunjuk mai sadié rajo. Madeak, rajo o téak ne.

Ujang, Buyung dan Upik aleu mai magea mai sadié rajo. Aleu mai mindi o, melitas penan tun selawié di nékét nano. Kenléak ne selawié di nékét o. Si tinget, asei ne adé nak lem bukeu ninik ne nano. Udo o si betanyé ngen tun nak di o. Nadeak Ujang, "Api si gén selawié tepékét o?" Tun madeak gén tun genatung o. Madeak gén ngenyan rajo. Jijey, di genatung o indok ne.

Sudo o, Ujang meloak Upik untuk jemago indok ne. Ujang ngen Buyung aleu magea rajo. "Kumu Bak!" nadeak ne ngen rajo.

Wakteu si madeak 'Bak' ngen rajo, rajo tekjir. "Uleak kulo ko bebak magea uku?"

Nadeak Ujang, "Awié yo, Rajo," nadeak ne. "Diyo ba bukeu ninik ku. Kémé

lahér, gi titik belo o, ninik midup kémé," nadeak ne. "Temeu si kémé nak jek'ung, kémé teleu basoak yo.


Rajo mukak bukeu o nano. Tinget rajo. "Diyo anak ku," nadeak ne. Tinget si nak lem atié ne, diyo pekué jisanak ngenyan ne. Si megep anak ne yo nano. Ngenyan ne ngen anak perpuan ne gi nak dalen. Indok ne jenago Upik ngen baik. Cigei si meding luko ne igei. Betakup igei kemléak anak ne o. Si ngindoi. Ngindoi, téak ne mai temtok tilei pékét indok ne o. Nadeak ne, "Coa si saleak nu. Diyo ba anak te nien."

Ujang, Buyung dan Upik temu'un indok ne di genatung nano.

Coa si pekué ku diyo," nadeak indok ne.

"Coa si ne," nadeak rajo. "Diyo adé ba pekué wak nu duei o," kata rajo. O ba si o betaup lemo banak samo ngindoi.

Ngindoi sapié pa'uo selawié duei banak o nano. Tentera o madeak, "Diyo pekué jisanak ngenyan kumu, di duei basoak o nano. Kémé monoak ne bai." Wakteu madeak lak monoak o nano, si mékét selawié duei o. Netak tentera rajo o monoak. Tapié anak teleu basoak lak madeak "Dang monoak!" jano, bi putus kagen tun duei o. Matié jisanak ne duei o bales pekué kidék ne nano. Tentera rajo déwék monoak ne.

Ijei ngen yo ba cerito Teleu Basoak yo.



Temanem pai bekboak pai,

Temanem lalang bekboak apei.

Note : ? mungkin yang di maksud hurud d


0 comments:

Rejang Land Pal

Support by

Add to Technorati Favorites blog-indonesia.com